27 oktyabr 2026-cı ildə Apple M6 prosessoru və 14 düymlük ekranı olan yeni MacBook Pro modelini təqdim edib. Noutbuk 12 nüvəli mərkəzi prosessor (CPU), 12 nüvəli qrafik prosessor (GPU) və hər biri 16 nüvəli iki Neural Engine bloku ilə təchiz olunub. M5 çipli modellərlə müqayisədə yeni noutbuk daha yüksək məhsuldarlıq göstərir və süni intellektlə bağlı tapşırıqların yerinə yetirilməsi üçün daha geniş imkanlar təklif edir. Cihaz yenilənmiş Siri AI və Apple Intelligence funksiyalarını dəstəkləyən macOS 27 əməliyyat sistemi ilə işləyir. 

MacBook Pro M6-nın bütün imkanları ilə tanış olmağınız üçün bu icmalı hazırlamışıq. 

MacBook Pro M6-da hansı yeniliklər var? 

Əsas yenilik M6 prosessorudur. Əvvəlki prosessor 10 nüvəli olduğu halda, M6-nın mərkəzi prosessoru 12 nüvədən ibarətdir: 

  • ən çox hesablama gücü tələb edən tapşırıqlar üçün 2 supernüvə; 
  • böyük həcmdə məlumatların emalı üçün 4 yüksək məhsuldarlıqlı nüvə; 
  • gündəlik əməliyyatlar üçün 6 enerjiyə qənaət edən nüvə. 

Bunun sayəsində noutbukda eyni vaxtda bir neçə proqram rahat işləyir, sistem əmrlərə daha sürətli cavab verir və mürəkkəb layihələr üzərində işləmək asanlaşır. Məsələn, eyni vaxtda fotoşəkilləri redaktə edə, proqram kodunu kompilyasiya edə və iş sənədləri arasında keçid edə bilərsiniz. 

Qrafik prosessorun nüvələrinin sayı da 10-dan 12-yə artırılıb. Bunun sayəsində qrafik məhsuldarlığı 30% yüksəlib. Fərq xüsusilə qrafik materiallarla işləyərkən, video montajı zamanı və oyunlarda hiss olunur. Materialların emalına və vizual effektlərin yaradılmasına daha az vaxt sərf olunur. Üçüncü nəsil şüa izləmə mühərriki təsvirlərdə kölgələri və işıqlandırmanı daha real əks etdirir, bu da oyun atmosferinə daha dərindən qərq olmağa imkan yaradır. 

Hər biri 16 nüvəli iki Neural Engine bloku sayəsində süni intellektlə bağlı tapşırıqlar 1,9 dəfə daha sürətli yerinə yetirilir. Bundan əlavə, qrafik prosessorun hər nüvəsinə neyron hesablamalarını sürətləndirən xüsusi bloklar əlavə edilib. Nəticədə süni intellektlə bağlı tapşırıqlarda, məsələn, süni intellekt vasitəsilə təsvirlər yaradılarkən məhsuldarlıq M5-lə müqayisədə 25%-dək artıb. 

Siri AI və Apple Intelligence-in imkanları genişləndirilib. Artıq səsli köməkçi sorğunuz əsasında mesajlarınızda, elektron məktublarınızda və fotoşəkillərinizdə sizə lazım olan məlumatları, məsələn, uçuş nömrənizi və ya qatar biletinizin ekran görüntüsünü tapa bilir. Safari-də süni intellekt açıq veb-səhifələri mövzular üzrə qruplaşdırmağa və saytlardakı yenilikləri izləməyə kömək edir. Məsələn, axtardığınız məhsul satışa çıxanda brauzer sizə avtomatik bildiriş göndərir. Nəzərə alın ki, bəzi funksiyalardan istifadə imkanı regiondan və cihazın sistem dilindən asılıdır. 

Baza modeli 16 GB vahid yaddaşla təchiz olunub. Çox resurs tələb edən proqramlarla müntəzəm işləyirsinizsə, 24 GB və ya 32 GB yaddaşa malik variantlardan birini seçə bilərsiniz. 

SSD yaddaşının üç tutum variantı var: 1, 2 və 4 TB. İş sənədlərinizi, fotoşəkillərinizi və videolarınızı saxlamaq üçün baza modeli kifayətdir. İrihəcmli fayllarla işləyirsinizsə və bulud xidmətlərindən istifadə etmirsinizsə, daha böyük yaddaş tutumuna malik modeli seçməyiniz məsləhətdir. 

Noutbuk bir dəfə şarj edildikdə 24 saata qədər video izləməyə imkan verir. Enerjiyə qənaət edən prosessor sayəsində MacBook Pro batareya ilə işləyərkən də yüksək məhsuldarlığını qoruyur. Cihaz sürətli şarjı dəstəkləyir. Uyğun 96 Vt gücündə USB-C adapterindən istifadə etdikdə batareyanı 50%-dək doldurmaq üçün yarım saat kifayətdir. Son illərdə MacBook Pro-nun batareya ilə işləmə müddəti xeyli artıb və M1 çipli modellə müqayisədə dörd saat uzanıb. 

MacBook Pro M6-nın dizaynı və ekranı 

Noutbukun dizaynı əvvəlki modellə eynidir. Korpusu təkrar emal edilmiş alüminiumdan hazırlanıb və iki rəngdə təklif olunur: Space Black və Silver. Noutbukun çəkisi 1,55 kq, ölçüləri isə belədir: 

  • eni – 31,26 sm;
  • qalınlığı – 1,55 sm;
  • dərinliyi – 22,12 sm.

Yığcam noutbuku işə, dərsə və ya səfərə aparmaq rahatdır. 

MacBook Pro M6

Noutbuk 14,2 düymlük Liquid Retina XDR ekranla təchiz olunub. ProMotion texnologiyası sayəsində ekranın yenilənmə tezliyi 120 Hz-ə, HDR məzmunu göstərilərkən isə pik parlaqlığı 1600 nitə çatır. Bunun sayəsində təsvirin qaranlıq və işıqlı hissələrindəki detallar daha aydın görünür. Güclü işıq altında tez-tez işləyirsinizsə, nanoteksturalı şüşəyə malik modeli seçə bilərsiniz. Bu şüşə işığın əks olunmasını azaldaraq ekrandakı parıltını minimuma endirir. 

Xarici cihazları qoşmaq üçün əlavə adapter almağa ehtiyac yoxdur. MacBook Pro-da monitorları, yaddaş qurğularını və aksesuarları qoşmaq üçün aşağıdakı port və yuvalar mövcuddur: 

  • xarici monitorları dəstəkləyən və məlumatları 40 Gbit/s-dək sürətlə ötürən üç Thunderbolt 4 portu; 
  • batareyanı doldurmaq üçün MagSafe 3 portu; 
  • yaddaş kartlarından faylları köçürmək üçün SDXC kart yuvası; 
  • monitor və ya televizor qoşmaq üçün HDMI portu; 
  • naqilli qulaqlıqlar üçün 3,5 mm-lik audio girişi. 

Eyni vaxtda üç ekrandan istifadə edə bilərsiniz: noutbukun öz ekranından və iki xarici monitordan. Məsələn, bir ekranda təqdimatı göstərə, ikinci ekranda iş proqramlarını aça, üçüncü ekranda isə qeydlərinizi saxlaya bilərsiniz. 

Noutbuk müasir simsiz rabitə standartlarını dəstəkləyən N1 çipi ilə təchiz olunub: 

  • simsiz şəbəkələrə yüksək sürətlə qoşulmaq üçün Wi-Fi 7; 
  • uyğun aksesuarlarla sabit bağlantı yaratmaq üçün Bluetooth 6; 
  • ağıllı ev cihazlarını vahid şəbəkədə birləşdirmək üçün Thread. 

12 MP-lik ön kamera videozənglər üçün olduqca əlverişlidir. Artıq tanış olan Center Stage funksiyası zəng zamanı hərəkət etdikdə belə, sizi kadrda saxlayır. Desk View funksiyası isə masanızın yuxarıdan görünüşünü göstərə bilir. Səs sistemi studiya səviyyəli üç mikrofondan və altı dinamikdən ibarətdir. 

MacBook Pro M6

MacBook Pro M6 kimlər üçün uyğundur? 

İcmalın sonunda yeni modelə keçidin kimlər üçün faydalı olacağına nəzər salaq. MacBook Pro M6 dizaynerlərə Affinity-də qrafik materialları daha sürətli emal etməyə, proqramçılara Xcode mühitində kodu daha tez kompilyasiya etməyə, video məzmun hazırlayan mütəxəssislərə və 3D rəssamlara isə layihələri üzərində daha səmərəli işləməyə kömək edir. 

MacBook Pro batareya ilə uzun müddət işlədiyinə və asan daşındığına görə ofis işçiləri və tələbələr üçün də əlverişli seçimdir. M5 çipli cihazınızı yeni modellə əvəz etməyi düşünürsünüzsə, bəzi tapşırıqları yerinə yetirərkən məhsuldarlıq fərqini hiss edəcəksiniz. Məsələn, yeni model qrafik materialları daha sürətli emal edir və süni intellektlə bağlı tapşırıqları daha tez yerinə yetirir. Sənədlərlə işləyərkən isə hər iki model eyni dərəcədə yaxşı nəticə göstərir. M1-M4 və ya Intel prosessorlu modellərdən yeni modelə keçməyə isə mütləq dəyər. 

Apple 2026-cı ilin oktyabrında ilk toxunma ekranlı MacBook modelini də təqdim edib. 

MacBook Pro M6-nı haradan almaq olar? 

Azərbaycanda MacBook Pro M6-nı Apple Premium Partner statusuna malik iSpace-dən ala bilərsiniz. Satışda yalnız rəsmi zəmanəti olan orijinal noutbuklar var. Suallarınız varsa, mütəxəssislərimiz onları onlayn və ya mağazada cavablandıracaqlar. 

Yeni modeli almadan əvvəl Bakı və Gəncədəki mağazalarımızda sınaqdan keçirə bilərsiniz. Məhsulu onlayn sifariş edib kuryerlə evinizə çatdırmaq da mümkündür. Daha sərfəli alış üçün Trade In proqramından, kredit və ya hissə-hissə ödəniş imkanlarından yararlana bilərsiniz. Yeni məhsulların təqdimatı barədə ilk xəbər tutanlardan olmaq və xüsusi təkliflərimizdən yararlanmaq üçün iSpace Community-yə qoşulun. 

Kataloqumuzdan sizə uyğun cihazı seçin: 


FAQ 

  1. MacBook Pro M6 nə vaxt satışa çıxıb?
    Apple noutbuku 27 oktyabr 2026-cı ildə təqdim edib. MacBook Pro M6 Azərbaycanda 13 noyabrda satışa çıxıb.
  2. MacBook Pro M6-nın texniki xüsusiyyətləri hansılardır?
    M6 çipində 12 nüvəli mərkəzi prosessor, 12 nüvəli qrafik prosessor və hər biri 16 nüvəli iki Neural Engine bloku var. Cihaz 16 GB vahid yaddaş və 1-4 TB tutumlu SSD ilə təchiz olunub. Vahid yaddaşı 24 və ya 32 GB olan variantlar da mövcuddur. 14,2 düymlük Liquid Retina XDR ekranla təchiz olunmuş noutbuk bir dəfə şarj edildikdə 24 saata qədər işləyir.
  3. MacBook Pro M6 M5 çipli modeldən nə ilə fərqlənir?
    Əsas fərq M6 çipidir. Onun qrafik məhsuldarlığı M5 çipininkindən 30%-dək yüksəkdir. Yeni model Wi-Fi 7, Bluetooth 6 və Thread standartlarını da dəstəkləyir.

BUNLARI DA OXUYUN:

iPad mini 8: OLED ekranlı ilk iPad mini-nin icmalı

AirPods 5: satış tarixi, qiyməti və Apple-ın yeni qulaqlıqlarına baxış

iPhone Duo: ilk qatlanan iPhone-un xüsusiyyətləri

Hər zaman xəbərdar olun!

Göndərilmələrə abunə olun, yeni aksiyalar və xüsusi qiymətlər barədə ilk məlumatları əldə edin!