iOS 27: Apple-ın sentyabr yeniləməsi hansı yenilikləri gətirib?

28.10.2026

Başlıqlar

1 Hansı iPhone modelləri iOS 27-ni dəstəkləyir?
2 iOS 27-də nə dəyişib?
3 iPhone-u iOS-un ən son versiyasına necə yeniləmək olar?
4 FAQ

Apple istifadəçiləri iOS 27-nin təqdimatını səbirsizliklə gözləyirdilər. Nəhayət, sentyabrın 14-dən etibarən yeni versiyanı yükləmək mümkün olub. Əməliyyat sisteminə bir sıra yeniliklər əlavə edilib: Siri AI adlı səsli köməkçi yenilənib, Apple Intelligence funksiyaları standart tətbiqlərə daha geniş şəkildə inteqrasiya olunub, fotoşəkilləri redaktə etmək üçün yeni alətlər əlavə edilib və valideyn nəzarəti imkanları təkmilləşdirilib. Bu məqalədə iOS 27-nin yenilikləri, onun hansı iPhone modellərinə uyğun olduğu və yeniləmənin necə quraşdırılması barədə məlumat verəcəyik.

Hansı iPhone modelləri iOS 27-ni dəstəkləyir?

iOS 27-ni əvvəlki versiyanı dəstəkləyən cihazlara, yəni iPhone 11 və daha yeni modellərə, eləcə də ikinci və üçüncü nəsil iPhone SE modellərinə quraşdırmaq mümkündür. Apple Intelligence funksiyaları iPhone 15 Pro, iPhone 15 Pro Max və daha yeni uyğun modellərdə mövcuddur. Lakin bu funksiyalardan istifadə imkanı cihazda seçilmiş dil və regiondan asılıdır.

iPhone 18 Pro və iPhone 18 Pro Max modellərindəki yeniliklər haqqında qısa videoya baxın:

iOS 27-də nə dəyişib?

Yeni əməliyyat sistemində əsas diqqət Apple Intelligence və Siri AI imkanlarının genişləndirilməsinə, eləcə də cihazın iş sürətinin artırılmasına yönəldilib. Artıq səsli köməkçiyə daha mürəkkəb tapşırıqlar həvalə edə, faylları daha sürətli paylaşa və yeni alətlərlə fotoşəkilləri redaktə edə bilərsiniz. Bəs iOS 27 daha hansı yenilikləri təqdim edir?

Tamamilə yenilənmiş Siri AI. Əvvəlki yazışmalarınızda müəyyən məlumatı tapmaq və ya təqvimə tədbir əlavə etmək istəyirsiniz? Bu tapşırıqları Siri-yə həvalə edə bilərsiniz. Səsli köməkçi ekrandakı məzmunu anlayır, şəxsi məlumatlarınızı və əvvəlki fəaliyyətlərinizi nəzərə alaraq müxtəlif tətbiqlərdə əməliyyatlar yerinə yetirə bilir. Bundan əlavə, Siri-nin ayrıca tətbiqində söhbət tarixçəsinə baxmaq və əvvəlki söhbətləri davam etdirmək mümkündür. Hazırda sınaq mərhələsində olan Siri AI-dən istifadə etmək üçün cihazın və Siri-nin dili eyni dəstəklənən dilə uyğunlaşdırılmalıdır. Azərbaycan dili isə hələlik dəstəklənən dillər siyahısına daxil edilməyib.
Daha yüksək sürət. AirDrop vasitəsilə faylların ötürülməsi 80%-ə qədər sürətlənib. Tətbiqlər 30%-ə qədər daha sürətli açılır, yeni çəkilmiş fotoşəkillər isə «Fotoşəkillər» tətbiqinin kitabxanasında 70%-ə qədər daha tez görünür.
Liquid Glass görünüşünün fərdiləşdirilməsi. Yeni əməliyyat sistemində şüşə effektli interfeys elementlərinin şəffaflığını və rəngini tənzimləmək mümkündür. Zövqünüzə uyğun olaraq bu elementləri demək olar ki, tam şəffaf və ya rəngli edə bilərsiniz. Tətbiq nişanları da əvvəlkindən daha aydın görünür.
Genişləndirilmiş valideyn nəzarəti. Valideynlər övladlarının tətbiqlərdən istifadəsinə daha rahat nəzarət edə bilərlər. Məsələn, tətbiqlərdən istifadə vaxtını dərs cədvəlinə uyğun tənzimləmək və ya övladlarının Safari-də yeni saytlara daxil olmaq üçün göndərdiyi icazə sorğularını təsdiqləmək mümkündür. Communication Safety funksiyasının təkmilləşdirilməsi sayəsində uşaqları çılpaqlıq, qan və zorakılıq səhnələrinin əks olunduğu foto və videolardan qorumaq üçün əlavə imkanlar yaradılıb.
Fotoşəkillərin redaktəsi üçün yeni imkanlar. Süni intellekt alətləri sayəsində artıq çəkilmiş fotoşəklin rakursunu dəyişmək, arzuolunmaz obyektləri silmək və təsvirin kənarlarını genişləndirmək mümkündür. Obyektlərin silinməsi funksiyası əvvəlki versiyalarda da mövcud idi, lakin indi daha dəqiq işləyir.
Fotoşəkillərin daha rahat paylaşılması. iCloud-da paylaşılan albomlar yaradaraq ailə məclislərində və ya tətildə çəkdiyiniz fotoşəkilləri bir yerə toplayıb yaxınlarınızla bölüşə bilərsiniz. Yaxınlarınız Android cihazlarından istifadə etsələr belə, alboma baxa bilərlər. Bunun üçün onlara iCloud.com saytında albomun keçidini göndərməyiniz kifayətdir.
Safari-də əlavə imkanlar. Notify Me funksiyası seçdiyiniz veb-səhifədəki dəyişiklikləri izləyir. Məsələn, axtardığınız kitab və ya tədbir biletləri hələ satışa çıxmayıbsa, müvafiq saytı mütəmadi yoxlamağınıza ehtiyac qalmır. Funksiyanı aktivləşdirin və yenilik olduqda bildiriş alın. Apple brauzerin görünüşünü də yeniləyib. Artıq açıq vərəqləri iş, alış-veriş, səyahət və digər mövzular üzrə qruplaşdırmaq mümkündür.

iOS 27-nin yenilikləri bununla məhdudlaşmır. Artıq Shortcuts tətbiqində qısayolları daha asan fərdiləşdirmək mümkündür. iPhone Wi-Fi və mobil şəbəkələr arasında daha rahat keçid edir, standart tətbiqlərin vidcetlərini isə böyüdərək ekranın daha böyük hissəsində yerləşdirmək olur.

Sistem səslərinin səviyyəsini də ayrı-ayrılıqda tənzimləmək mümkündür. Məsələn, zəngli saatın daha yüksək, bildirişlərin isə daha zəif səslənməsini seçə bilərsiniz. Bütün bu yeniliklər iPhone-dan gündəlik istifadəni daha rahat edir.

iPhone-u iOS-un ən son versiyasına necə yeniləmək olar?

iPhone-u ən son versiyaya yeniləmək üçün sabit Wi-Fi bağlantısı və bir qədər vaxt lazımdır. Bunun üçün aşağıdakı addımları yerinə yetirin:

Məlumatlarınızın ehtiyat nüsxəsini yaradın. Kontaktlarınızın, fotoşəkillərinizin və digər vacib məlumatlarınızın ehtiyat nüsxəsini iCloud-da və ya kompüterdə saxlayın. Yeniləmə zamanı problem yaranarsa, məlumatlarınızı asanlıqla bərpa edə bilərsiniz.
Yeniləmənin mövcud olub-olmadığını yoxlayın. «Parametrlər» → «Əsas» → «Proqram təminatının yenilənməsi» bölməsinə keçin. Burada əməliyyat sisteminin hazırkı versiyası və mövcud yeniləmələr göstərilir. iOS 27 yeniləməsini seçin.
iPhone-u enerji mənbəyinə qoşun. Yeniləmə zamanı cihazı enerji mənbəyinə qoşulu saxlayın.
Quraşdırmaya başlayın. «Yüklə və quraşdır» seçiminə toxunun və ekrandakı təlimatlara əməl edin. Telefonunuz gün ərzində Sizə lazımdırsa, yeniləməni gecə saatlarında quraşdırmağı seçə bilərsiniz.
Quraşdırmanın tamamlanmasını gözləyin. Prosesi yarımçıq dayandırmayın və ekrandakı göstərişlərə əməl edin. iPhone yenidən işə düşdükdən sonra iOS 27-nin yeniliklərindən istifadə edə biləcəksiniz.

Yeni versiyanı birbaşa iPhone-da quraşdıra bilmirsinizsə, əməliyyat sistemini kompüter vasitəsilə də yeniləyə bilərsiniz. Bunun üçün macOS Catalina (2019) və ya daha yeni əməliyyat sistemi ilə işləyən Mac kompüterindən istifadə edə bilərsiniz. iPhone-u kabellə kompüterə qoşun və Finder tətbiqini açın. Yan paneldə cihazınızı seçin, «Əsas» bölməsinə keçin və «Yeniləmələri yoxla» seçiminə klikləyin. macOS Mojave və daha əvvəlki versiyalarda isə iTunes-dan istifadə edin. Yeniləmənin quraşdırılması qaydası oxşardır.

Yalnız Windows əməliyyat sistemi ilə işləyən kompüteriniz varsa, iOS-u onun vasitəsilə də yeniləyə bilərsiniz. Microsoft Store-dan Apple Devices tətbiqini yükləyib quraşdırın və iPhone-u kabellə kompüterə qoşun. Tətbiqin yan menyusundan cihazınızı seçin və «Əsas» bölməsinə keçin. Sonra «Yenilə» düyməsinə klikləyin, yeniləməni təsdiqləyin və ekrandakı təlimatlara əməl edin.

Cihazınızda kifayət qədər boş yaddaş yoxdursa, yeniləmə zamanı problemlər yarana bilər. Lazımsız faylları silə və ya bulud yaddaşına köçürə, daha sonra yenidən cəhd edə bilərsiniz.

Hər hansı sualınız yaranarsa, mütəxəssislərimizə müraciət edə bilərsiniz. Bunun üçün Bakıdakı rəsmi mağazalarımıza baş çəkin və ya telefonla, yaxud saytımızdakı çat vasitəsilə bizimlə əlaqə saxlayın. Apple Premium Partner statusuna malik iSpace mağazalarında iPhone-unuzu sərfəli şərtlərlə yenisi ilə əvəz edə bilərsiniz. Çeşidimizdə yalnız istehsalçı zəmanəti ilə təqdim olunan orijinal cihazlar var. Trade In proqramından yararlana, yeni cihazı kreditlə və ya hissə-hissə ödənişlə əldə edə bilərsiniz. Onlayn sifarişlər üçün ölkə üzrə çatdırılma xidməti də mövcuddur. iSpace Community-yə qoşulun və xüsusi təkliflərimizdən ilk xəbərdar olanlardan biri olun.

Kataloqumuzdan yeni iPhone-unuzu seçin:

FAQ

iOS 27 nə vaxt təqdim olunub?
Apple yeni versiyanı 8 iyun 2026-cı ildə keçirilən WWDC26 konfransında təqdim edib. Rəsmi versiya isə sentyabrın 14-də istifadəyə verilib.
iOS-un ən son versiyasını hansı iPhone modelləri dəstəkləyir?
Yeniləməni iPhone 11 və daha yeni modellərə, eləcə də ikinci və üçüncü nəsil iPhone SE modellərinə quraşdırmaq mümkündür. Siri AI də daxil olmaqla Apple Intelligence funksiyaları isə yalnız iPhone 15 Pro, iPhone 15 Pro Max və daha yeni uyğun modellərdə mövcuddur. Bu imkanlardan istifadə cihazda seçilmiş dil və regiondan asılıdır.
iOS 27-də hansı yeniliklər var?
Sentyabr yeniləməsi ilə iOS-a təkmilləşdirilmiş valideyn nəzarəti funksiyaları, fotoşəkilləri redaktə etmək üçün yeni alətlər və yenilənmiş Siri AI səsli köməkçisi əlavə olunub. Artıq iCloud-da paylaşılan albomlar vasitəsilə fotoşəkilləri yaxınlarınızla bölüşmək və Liquid Glass interfeysinin görünüşünü zövqünüzə uyğun tənzimləmək mümkündür.
iOS 27-ni iPhone-a necə quraşdırmaq olar?
Əvvəlcə məlumatlarınızın ehtiyat nüsxəsini yaradın. Sonra iPhone-u Wi-Fi şəbəkəsinə və enerji mənbəyinə qoşun. «Parametrlər» → «Əsas» → «Proqram təminatının yenilənməsi» bölməsinə keçin. Yeni versiyanı yükləyin və ekrandakı təlimatlara əməl edin.
iOS 27-də Apple Intelligence-ın hansı yeni funksiyaları var?
Yenilənmiş Siri AI səsli köməkçisi ekrandakı məzmunu anlayır və müxtəlif tətbiqlərdə daha çox əməliyyat yerinə yetirə bilir. «Fotoşəkillər» tətbiqindəki redaktə alətləri də təkmilləşdirilib. Yenilənmiş Clean Up funksiyası fotoşəkillərdən hətta böyük obyektləri belə silməyə, Extend isə fotoşəklin kənarlarını genişləndirməyə imkan verir.
iOS-u ən son versiyaya yeniləmək lazımdırmı?
Bəli, cihazınız iOS 27-ni dəstəkləyirsə, yeniləməni quraşdırmağınız tövsiyə olunur. Beləliklə, yeni funksiyalardan istifadə edə və təkmilləşdirilmiş təhlükəsizlik imkanlarından yararlana bilərsiniz.