«iSpace» mağazalar şəbəkəsində hədiyyə sertifikatlarının ödənişi, əldə edilməsi və dəyişdirilməsi qaydaları haqqında Qaydalar

1. ÜMUMİ MÜDDƏALAR

1.1. Hədiyyə sertifikatı (bundan sonra – Sertifikat) – Sertifikatın sahibinə «iSpace» mağazalar şəbəkəsində «ASBC» MMC (bundan sonra – Şirkət) tərəfindən satılan mal və ya xidmətləri Sertifikatın nominal dəyərinə bərabər məbləğdə əldə etmək hüququ verən sənəddir.

Sertifikat fərdi nömrəni, alınma tarixini və müəyyən edilmiş nominal dəyəri özündə əks etdirir.

Sertifikatın Alıcısı – Sertifikatın nominal dəyəri qədər məbləği, Sertifikatın satıldığı məntəqədə satılan malları müvafiq dəyərə almaq üçün ödəmiş və Sertifikatı üçüncü fiziki şəxsə təqdim etmiş fiziki və ya hüquqi şəxsdir. Bu halda üçüncü şəxs Sertifikatı seçdiyi mallara dəyişdirmə yolu ilə həmin malları əldə etmək hüququna malik olur.

Sertifikatın Sahibi – Hədiyyə sertifikatını müvəqqəti sahibliyinə almış və onu icra olunmaq üçün təqdim etmiş fiziki şəxsdir.

1.2. Sertifikatların ödənişi, əldə edilməsi və dəyişdirilməsi qaydaları bu Qaydalarla tənzimlənir.

1.3. Hədiyyə sertifikatı adlı deyil. Sertifikatın Alıcısı Sertifikatı hədiyyə edə və ya digər şəkildə üçüncü şəxsə təqdim edə bilər. Şirkət Sertifikatın Alıcısı və ya üçüncü şəxs tərəfindən Sertifikatın kimə və hansı əsasla verilməsinə görə məsuliyyət daşımır.

1.4. Hədiyyə sertifikatı ümumi oferta hesab olunur. Bu Qaydalar sertifikatlardan istifadə etməklə bağlanan ümumi alqı-satqı müqaviləsinin əsas şərtlərini müəyyən edir.

Sertifikat satılarkən Alıcı bu Qaydalarda müəyyən edilmiş sertifikatların istifadə qaydaları ilə tanış edilir. Sertifikatın əldə edilməsi, Sertifikatın Alıcısının bu Qaydalarla razılaşdığını ifadə edir.

1.5. Bu Qaydalar https://ispace.az internet saytında açıq şəkildə yerləşdirilmişdir, həmçinin «iSpace» mağazalarının ticarət zallarında da aşağıdakı ünvanlarda mövcuddur:

Deniz Mall

Ünvan: Mikayıl Hüseynov prospekti 26B, 1-ci mərtəbə

Park Bulvar

Ünvan: Neftçilər prospekti 42, 1-ci mərtəbə

28 Mall

Ünvan: Azadlıq prospekti 15A/4, 1-ci mərtəbə

Port Baku

Ünvan: Neftçilər prospekti 151, 1-ci mərtəbə

1.6. Şirkət bu Qaydalara öz mülahizəsinə əsasən dəyişikliklər etmə hüququnu özündə saxlayır.

2. HƏDİYYƏ SERTİFİKATININ ƏLDƏ EDİLMƏ QAYDASI

2.1. Sertifikatlar ödəniş müqabilində, nağd və/və ya nağdsız qaydada əldə olunur və Sertifikat təqdim edildiyi anda Şirkətdə mövcud olan malların və ya xidmətlərin alınması üçün istifadə edilir.

2.2. Sertifikatın Alıcısı Şirkətin kassasına Sertifikatın nominal dəyərinə bərabər məbləğdə pul vəsaiti ödəyir və ya Sertifikatların ödənişi üçün həmin məbləği nağdsız qaydada Şirkətin hesabına köçürür.

2.3. Sertifikatın nominal dəyəri həmin Sertifikatın sahibinə Sertifikatda göstərilən məbləğə uyğun olaraq mal əldə etmək hüququ verir.

2.4. Sertifikatın nominal dəyəri Sertifikatın üzərində göstərilir.

2.5. Hədiyyə Sertifikatının nümunəsi:

2.6. Sertifikat satıldıqda, Sertifikatın Alıcısına fiziki şəxslərə maddi uçotun aparılması və istehlakçıların hüquqlarının qorunması məqsədilə fiskal çek təqdim olunur. Hüquqi şəxslərə Sertifikat satıldıqda isə sertifikatın təhvil-təslim aktı, nağd ödəniş halında isə fiskal çek verilir.

2.7. Sertifikat satıldığı gün aktivləşdirilir və Sertifikatın özündə başqa cür göstərilmədiyi halda, Sertifikat alındığı tarixdən etibarən 12 (on iki) ay müddətində qüvvədə olur.

2.8. Sertifikatın qüvvədəolma müddəti uzadılmır.

2.9. Sertifikatın alınmasına endirimlər şamil edilmir.

2.10. Sertifikat itirildiyi, oğurlandığı və ya zədələndiyi halda bərpa olunmur, ödənilmiş pul vəsaiti geri qaytarılmır.

2.11. Sertifikat dəyişdirilmir və geri qaytarılmır, ona 19 sentyabr 1995-ci il tarixli, № 1113 saylı Azərbaycan Respublikasının “İstehlakçıların hüquqlarının müdafiəsi haqqında” Qanununun müddəaları şamil olunmur.

2.12. Sertifikat öz qüvvədəolma müddəti ərzində istifadə edilmədiyi halda, onun üçün ödənilmiş pul vəsaiti geri qaytarılmır. Sertifikat üzrə qalan məbləğ də geri qaytarılmır.

2.13. Şirkət aşağıdakı hallarda Sertifikatın Sahibinə Sertifikatın istifadə olunmasından imtina edə bilər:

2.13.1. Sertifikatın sahibi Şirkətin xidmətlərinin ödənilməsi üçün Sertifikatı təqdim etmədikdə və ya Sertifikatın saxtalaşdırılmasına dair əlamətlər olan başqa bir sənəd təqdim etdikdə;

2.13.2. Sertifikatın Sahibi müddəti bitmiş Sertifikatı istifadə üçün təqdim etdikdə;

2.13.3. Sertifikatın Sahibi Sertifikatın nömrəsinin, nominal dəyərinin və qoruyucu nişanlarının oxunmasını mümkünsüz edən dərəcədə zədələnmiş Sertifikatı təqdim etdikdə;

2.13.4. Sertifikatın Sahibi əvvəl istifadə edilmiş Sertifikatı təqdim etdikdə.

3. HƏDİYYƏ SERTİFİKATININ İSTİFADƏ EDİLMƏSİ

3.1. Sertifikatlar «iSpace» mağazalar şəbəkəsinin bütün mağazalarında qəbul edilir. Şirkət bu Qaydaların şərtlərinə uyğun olaraq, Sertifikatı təqdim edən şəxsin (Sertifikatın Sahibindən) kimliyindən və Sertifikatı hansı əsasla əldə etməsindən asılı olmayaraq, Sertifikat təqdim edildiyi anda Şirkətdə mövcud olan mallardan məhsulu aşağıdakı şərtlərlə həmin şəxsə təhvil verməyi öhdəsinə götürür:

• Hədiyyə sertifikatı yetkinlik yaşına çatmış və fəaliyyət qabiliyyətli şəxs tərəfindən təqdim oluna bilər;
• Hədiyyə sertifikatı yetkinlik yaşına çatmamış şəxs tərəfindən yalnız valideynlərindən (qanuni nümayəndələrindən) biri ilə birlikdə təqdim edilə bilər.

3.2. Sertifikatın nominal dəyərinin tamamı məhsulun alınması zamanı bir dəfəlik və tam şəkildə istifadə olunur.

3.4. Sertifikat üçün pul vəsaiti yalnız bir dəfə, onun alınması zamanı yüklənir.

3.5. Sertifikatın Sahibi Sertifikatın zədələnmə ehtimalı ilə əlaqədar olaraq Sertifikatın satışına dair fiskal çeki qoruyub saxlamalıdır.

3.6. Sertifikatın mallarla (işlərlə, xidmətlərlə) dəyişdirilməsi zamanı üç vəziyyət yarana bilər:

• Malın (işin, xidmətin) dəyəri Sertifikatın nominal dəyərinə bərabər olduqda;
• Malın (işin, xidmətin) dəyəri Sertifikatın nominal dəyərindən çox olduqda;
• Malın (işin, xidmətin) dəyəri Sertifikatın nominal dəyərindən az olduqda.

3.7. Seçilmiş malların ümumi dəyəri Sertifikatın nominal dəyərini aşdığı halda, yaranmış fərq Sertifikatın Sahibi tərəfindən nağd qaydada Şirkətin kassasına və/və ya nağdsız qaydada ödənilir.

3.8. Seçilmiş malların (işlərin, xidmətlərin) ümumi dəyəri Sertifikatın nominal dəyərindən az olduqda, yaranmış fərq Sertifikatın Sahibinə qaytarılmır.

3.9. Şirkətin sayış kampaniyalarında olan malların Sertifikat vasitəsilə ödənilməsi mümkündür. Lakin həmin mallar Sertifikat vasitəsilə ödənildikdə Şirkətin hüququ var ki, endirimlərin tətbiqinə məhdudiyyət qoysun..

3.10. “Wallet” bonus xalları Sertifikatın alıcısına hesablanmır.

3.11. Birdəfəlik alış-veriş zamanı bir neçə Sertifikatın birlikdə istifadə olunmasına icazə verilir.

3.12. Zədələnmiş Sertifikatlar və ya Şirkət nümayəndələrində əsliliyinə dair şübhə yaranan Sertifikatlar qəbul edilmir və istifadə olunmur.

4. ƏLAVƏ ŞƏRTLƏR

4.1. Sertifikat vasitəsilə alınmış keyfiyyətsiz malların və ya lazımi keyfiyyətdə olmayan malların zəmanət xidməti, dəyişdirilməsi və qaytarılması Azərbaycan Respublikasının qüvvədə olan qanunvericiliyində nəzərdə tutulmuş ümumi qaydalar əsasında həyata keçirilir. Belə mallar yalnız eyni və ya oxşar mallarla dəyişdirilir. Pul vəsaitinin qaytarılması həyata keçirilmir.

4.2. Şirkət hədiyyə sertifikatları ilə bağlı bu Qaydalara istənilən vaxt öz təşəbbüsü ilə və birtərəfli qaydada dəyişikliklər etmək hüququnu özündə saxlayır. Qaydalara edilmiş dəyişikliklərlə bağlı məlumat Şirkətin internet saytında yerləşdirilir və tanış olmaq üçün açıq olur. Sertifikatın Sahibi Sertifikatın istifadə qaydalarında aparılan dəyişiklikləri özü izləməlidir.

4.3. Sertifikat adsız olduğu və şəxsiyyətin təsdiqini tələb etmədiyi üçün onun icazəsiz (qeyri-qanuni) istifadəsinə görə Şirkət məsuliyyət daşımır.

4.4. Fors-major halları baş verdiyi və bu səbəbdən Sertifikatın istifadə edilməsi mümkün olmadığı halda, Şirkət məsuliyyətdən azad olunur.