Apple şirkətinin yay təqdimatı: WWDC 2025-dən ən maraqlı məqamlar 

9 iyun tarixində Apple şirkətinin yaradıcı şəxslər üçün təşkil etdiyi əsas tədbir – illik WWDC 2025konfransı başladı. İlk gündə brend iPhone, Apple Watch, Apple TV, Mac, Apple Vision Pro və iPad üçün yeni əməliyyat sistemlərini təqdim etdi. Ən maraqlı yenilikləri təqdim edirik.

Bütün platformalar üçün vahid dizayn 

Bütün əməliyyat sistemləri qarşıdan gələn ilə uyğun olaraq 26 rəqəmi ilə adlandırıldı. İndi platformalar belə adlanır: iOS 26, watchOS 26, tvOS 26, macOS Tahoe 26, visionOS 26 və iPadOS 26. 

Bütün əməliyyat sistemləri üçün vahid dizayn “Liquid Glass” – yəni “maye şüşə” adlandı. İndi bütün düymələr, pəncərə fonları, bölmələr, naviqasiya menyuları və hətta standart tətbiqlərin elementləri mat şüşə görünüşündədir. Bu şüşə ətraf mühitdəki kontentə uyğun rəngini dəyişə bilir, lakin istifadəçinin diqqətini yayındırmadan. Ekrandakı elementlər müasir, kənarları yumşaldılmış ekranlara uyğunlaşdırılıb. Liquid Glass dizaynı bir tərəfdən tanış və rahat görünür, digər tərəfdən isə tamamilə yenilənmiş hiss yaradır. Xatırladaq ki, Apple əməliyyat sistemlərinə son genişmiqyaslı redizaynı 2013-cü ildə – iOS 7 ilə etmişdi. İndi isə bu boşluğu doldurmağa qərar verib.

iOS 26-da hansı yenilik var: yepyeni dizayn və əla funksiyalar 

• Bloq ekranı yenilənib. İndi o, yumşaq bucaqlara sahib şüşə tipli yeni pərdə ilə təqdim olunur, bütün simvollar isə “şüşə effekti”nə malikdir. Saatlar divar kağızına uyğunlaşır və lazım gəldikdə uzanır. Vizual olaraq gözoxşayan görünür. 

• Live Translation – Apple Intelligence vasitəsilə canlı tərcümə funksiyası. Bu funksiya xarici dili real vaxtda tərcümə edir və dərhal sizin ana dilinizdə səsləndirir. Zənglər və yazışmalar zamanı — “Telefon”, FaceTime və “Mesajlar” tətbiqlərində işləyir. Beləliklə, dili bilmədən ünsiyyət qurmaq indi daha asandır. 

• “Kamera” tətbiqində bəzi funksiyalar yan menyuya və açılan pəncərələrə köçürülüb. İndi əsas ekranda yalnız “Foto” və “Video” rejimləri qalır – artıq heç nə yoxdur. 

• “Games” adlı yeni tətbiq istifadəyə verilib. Burada geniş oyun kitabxanası, Apple Arcade inteqrasiyası və Game Center funksiyaları yer alıb. App Store-un yalnız oyunlara həsr olunmuş versiyası kimidir. Dostlarınızın hansı oyunları oynadığını görmək, nailiyyətləri müqayisə etmək və challenge-lər təşkil etmək mümkündür. 

• iMessage-də qrup çatları, sorğu yaratmaq funksiyası və süni intellektlə hazırlanmış gözəl fonlar əlavə olunub. 

• Visual Intelligence – “Vizual intellekt” funksiyası minlərlə istifadəçinin həyatını asanlaşdıracaq. Sistem ekrandakı kontenti tanıyır və onunla qarşılıqlı əlaqə qurmağa imkan verir. Məsələn, xəbər lentində bir lampa görürsünüz – üzərinə klikləyirsiniz və oxşar məhsulları onlayn axtarıb tapırsınız. Ekranda maraqlı bir tarix görünsə, onu birbaşa təqvimə əlavə etmək mümkündür. 

• Tətbiqlərin yenilənməsi. Safari-də aşağı paneli kiçik sətrə yığmaq mümkündür, bu da daha geniş görüntü sahəsi yaradır. “Foto” tətbiqində isə indi iki bölmə var: “Kitabxana” və “Albomlar”. 

• iMessage-dəki Mixmoji funksiyası bir neçə emojini birləşdirərək unikal emoji yaratmağa imkan verir. Image Playground funksiyası vasitəsilə isə ChatGPT köməyi ilə təsvirlər yaratmaq olar.


• Apple Music-də mahnıların tərcüməsinə baxmaq imkanı əlavə olunub. Həmçinin, tələffüz öyrədici karaoke funksiyası da dəstəklənir – bu da xarici mahnıları başa düşməyi və ifa etməyi daha asan edir.

iOS 26 hansı iPhone modellərinə gələcək?

iPhone 11-dən başlayaraq bütün modellərə. Amma nəzərə alın ki, bir çox yeni funksiyalar Apple Intelligence əsaslıdır və bu da bütün iPhone modelləri tərəfindən dəstəklənmir. Həmçinin, bəzi seçimlərin əlçatanlığı regiondan və dildən asılıdır. 

watchOS 26 fərdi Süni İntellekt köməkçisi və yeni jestlərlə

• Yeni fərdi süni intellekt məşqçisi – Workout Buddy istifadəyə verilib. O, sizin üçün məşq proqramı tərtib edəcək, motivasiya edəcək və məşqin sonunda sizi tərifləyəcək. Əslində, sizi daim ruhlandıracaq bir robotdur. İlk mərhələdə yalnız ingilis dilində əlçatan olacaq. 

• Yeni jest əlavə olunub: zəngi sonlandırmaq və ya bildirişləri silmək üçün sadəcə biləyi özünüzdən uzağa çevirmək kifayətdir. Bu funksiyanın bütün modellərdə işləməyə biləcəyi ehtimal olunur. 

• Yana düyməyə basmaqla açıq tətbiqlərin smart stack göstərilir: burada sizin gündəlik istifadə etdiyiniz və ehtiyaclarınıza uyğun tətbiqlər ön sırada yer alır. 

watchOS 26 şüşə effekti ilə yarımşəffaf yeni dizayna sahibdir və bu, dairəvi ekranlarda çox zövqlü görünür. Həmçinin, saatlarda Live Translation funksiyası da var – sizə lazım olan dilə avtomatik tərcümə imkanı yaradır.

tvOS 26-da nə yenilik var: posterlər və profillər arasında rahat keçid imkanı

• Digər əməliyyat sistemlərində olduğu kimi, tvOS 26-da da dizayn “şüşə effekti” ilə təqdim olunub – estetikaya önəm verənlər üçün əla seçimdir. 

• Apple TV açıldıqda istifadəçi istədiyi profili seçə bilir və bu əsasda fərdi tövsiyələr alır. 

• Karaoke artıq daha da mükəmməldir: iPhone sahibləri telefonlarını mikrofon kimi istifadə edə bilərlər. Apple TV eyni anda bir neçə iPhone qoşmağa da imkan verir – axı karaoke tək oxunmur! 

• Kontent izlənərkən ekranın mərkəzinə keçir, idarəetmə funksiyaları isə pərdə arxasında gizlənir. 

• Apple TV tətbiqinə kinoya xas afişalar – kinoposterlər əlavə olunub.

macOS 26 Tahoe: Spotlight üçün əla imkanlarla

• Spotlight axtarış funksiyası super imkanlara sahib olub. O, fayllara, mübadilə yaddaşına (clipboard) çıxış əldə edir və axtarış sətri aktiv tətbiqə uyğun olaraq davranır. İndi Spotlight vasitəsilə təkcə tətbiqləri axtarıb açmaq yox, elə həmin tətbiqlər daxilində əmrləri də icra etmək mümkündür. Məsələn, əgər istifadəçi ilk dəfə Mac alıb və hələ necə istifadə etməyi bilmirsə, Spotlight-a sadəcə nə etmək istədiyini yaza bilər. Axtarış nəticələri isə istifadəçiyə uyğunluq dərəcəsinə görə sıralanır. 

• Yeni dizaynla menyu sətri və İdarəetmə Mərkəzi şəffaf olub – bu da ekranın daha geniş görünməsinə səbəb olur. 

• macOS interfeysini fərdiləşdirmək mümkündür: ikonların və qovluqların rəngini dəyişmək olar – iPhone-da olduğu kimi. 

• Continuity funksiyası ilə əlaqəli olaraq, Mac-də “Telefon” tətbiqi əlçatan olub. Bu tətbiq smartfonda olan funksiyaların eynisini Mac-də də təqdim edir. 

• Mübadilə yaddaşında artıq konkret elementləri seçmək mümkündür – çünki daha əvvəl hər yeni kopyalama əvvəlkini silirdi. 

• iOS 26-da olduğu kimi, macOS 26 Tahoe-da da mesajları və zəngləri öz ana dilinizə tərcümə etmək olur – xaricilərlə ünsiyyət daha rahat olacaq. Bu funksiyanı Apple Intelligence təmin edir. “Games” adlı yeni tətbiq oyun həvəskarlarını sevindirəcək. Yaxın zamanda Mac-də Cyberpunk 2077, Hitman: World Of Assassination kimi oyunlar da əlçatan olacaq. 

• Əvvəllər yalnız iPhone-da olan “Gündəlik” tətbiqi artıq Mac-də də mövcuddur. Uzun fikirləri yazmaq, hissləri ifadə etmək daha komfortlu olacaq. 

visionOS 26: realistik avatarlar və üçüncü tərəf aksesuar dəstəyi

• Apple Vision Pro-da indi səhifələri gözlə izləyərək fırlatmaq mümkündür. Əvvəllər bu yalnız barmaq jestləri ilə olurdu. 

• Fərqli ölçülərdə 3D vidjetlər əlavə olunub – bunları masaüstünə yerləşdirmək və ya obyektlərə, məsələn, otağın divarına “bərkitmək” mümkündür. Bunlar qeydlər, xatırlatmalar, təqvim, hava durumu və digər funksiyalar ola bilər. Qalereyadan bir şəkil yerləşdirilsə, o da rəqəmsal çərçivə ilə bəzədiləcək. 

• Videozənglər üçün hazırlanmış həcmli avatarlar daha real görsənir: mimikalar, dərinin və saçların rəng ötürməsi təkmilləşdirilib. 

• Gözlük vasitəsilə Spatial rejimində çəkilmiş fotoları üçölçülü obyektlər kimi izləmək mümkündür. 

• Üçüncü tərəf aksesuarlarına dəstək əlavə olunub: havada rəsm çəkmək üçün stiluslar, oyun kontrollerləri, action-kameralar və s. 

iPadOS 26: Mac-dəki kimi yeni pəncərə görünüşü və menyu sətri

• Artıq planşet istifadəçiləri pəncərələrin ölçüsünü rahatlıqla dəyişə və onlar arasında kompüterdəki kimi keçid edə bilərlər. Eyni anda 7 pəncərəni açıq saxlamaq mümkündür. iPad-in çoxtapşırıqlı istifadə üçün nəzərdə tutulduğunu nəzərə alsaq, bu çox faydalı funksiyadır. Açıq pəncərələri bir baxışda görmək üçün isə yeni Expose funksiyası əlavə olunub. 

• Kursor daha çox kompüterdəki kursoru xatırladır. Trackpad ilə çoxtapşırıqlı idarə üçün yeni jestlər əlavə olunub. 

• Nəhayət, ekranın yuxarı hissəsində menyu sətri görünüb – iPad getdikcə daha çox Mac-ə bənzəyir. 

• “Fayllar” tətbiqi yenilənib. Qovluqları birbaşa ekranın altındakı Dock panelinə əlavə etməklə naviqasiyanı sürətləndirmək mümkündür. “Preview” (Baxış) tətbiqi sənədlərlə və PDF-lərlə işləməyi asanlaşdırır – tam Mac-dəki kimi. 

• “Gündəlik” və “Oyunlar” tətbiqləri də əlavə olunub. 

• Artıq sistem üçüncü tərəf tətbiqlərin fon rejimində işləməsini dəstəkləyir. Onlar fon rejimində “ağır” tapşırıqları, məsələn, video montajı icra edə bilər və dayanmadan davam edir. İstifadəçi isə Live Activities vasitəsilə prosesə nəzarət edə bilər. 

• İndi hər bir tətbiq və hətta sayt üçün ayrıca mikrofon seçmək imkanı var.

Ümumilikdə iPadOS 26, iOS 26-da olan bir çox funksiyanı dəstəkləyir: eyni dizayn, iMessage funksiyaları, Vision Intelligence və digər imkanlar. 

Əməliyyat sistemləri yükləmə üçün əlçatan olduqda, onları dərhal test edəcəyik. iOS 26, iPadOS və macOS haqqında ətraflı icmalı iSpace bloqumuzda oxuya bilərsiniz. Maraqlı yenilikləri qaçırmamaq üçün Instagram səhifəmizə abunə olun. 

BUNLARI DA OXUYUN 

Yeni süni intellekt, Mac-dan iPhone-a nəzarət və digər funksiyalar: ən əsası isə WWDC-2024

Apple sübut etdi ki, biz artıq gələcəkdə yaşayırıq: WWDC-2023